Kabilang ang barangay UP campus sa listahan ng 20 lugar sa Quezon City na may mataas na antas ng krimen mula pa noong 2016.
Ito ang inihayag ng Philippine National Police (PNP) batay sa kanilang monitoring sa nabanggit na lugar na protektado ng UP-DND accord bago ito ipawalang bisa noong isang linggo.
Ayon kay PNP Spokesman P/Bgen. Ildebrandi Usana, nakapagtala ang brgy. UP campus ng 542 krimen sa nakalipas na 5 taon kaya naman itinuturing ito bilang crime hotspot ng lungsod.
Batay sa datos mula sa blotter ng Brgy. UP, 250 sa mga krimen dito ang may kinalaman sa iligal na droga, 106 ang theft, 72 ang robbery, 36 ang physical injury, 21 ang rape, 14 ang murder, 23 ang carnapping at 2 naman ang complex crime na robbery with homicide.
Ayon kay Usana, bagama’t may naitala naman silang pagbaba sa bilang ng mga nabanggit na krimen nuong isang taon dahil sa COVID-19 pandemic, patuloy pa rin silang nakapagtatala ng gayon sa nasabing panahon.
Maliban pa aniya sa mga tinukoy na krimen ani Usana, may naitala ring mga kaso ng estafa, illegal gambling, malicious mischief, direct assault, paglabag sa karapatan ng mga babae at bata, paglabag sa quarantine protocols at iba pa.
