Dumistansya ang Palasyo sa isyu ng muling pagbuhay sa panukalang batas na death penalty o parusang kamatayan.
Ito ang naging pahayag ng Palasyo sa gitna ng panukala na ipasa ang parusang kamatayan makaraang walang-awang patayin ni Police Senior Master Sergeant Jonel Nuezca ang mag-inang sina Sonya Gregorio at Frank Anthony Gregorio sa Paniqui sa Tarlac.
Ayon kay Presidential spokesman Secretary Harry Roque, kanila nang ipinauubaya sa kongreso ang muling pagbuhay sa panukalang death penalty.
Giit pa ni Roque, noon pa man ay prayoridad na ng administrasyon ang muling pagbuhay sa death penalty partikular sa mga wide scale drug trafficking.
Sa huli, naniniwala si Roque na nasa kongreso ang problema dahil hati aniya ang pananaw ng mga mambabatas sa isyu ng muling pagbuhay ng death penalty.