Naniniwala ang Department of the Interior and Local Government (DILG) na makatutulong sa pag-iwas sa hawaan ng COVID-19 ang pagpapasara sa mga himlayan o sementeryo ngayong paparating na Undas.
Ito’y ayon kay DILG Sec. Eduardo Año bilang pagsuporta sa mga naging hakbang ng iba’t-ibang lokal na pamahalaan bilang pag-iingat na rin sa kanilang nasasakupan.
Ayon sa kalihim, bagama’t suportado niya ang nasabing hakbang, mananatili pa rin sa kamay ng mga local chief executives ang pagpapasya kung ipatutupad nila ito o hindi sa kanilang lugar.
Tulad aniya sa National Capital Region (NCR) kung saan, pagpupulungan pa ng Metro Manila Council kung magiging isa ang kanilang tindig hinggil sa usapin.
Kasunod nito, sinabi ni Año na makabubuting gunitain ng publiko ang kanilang mahal sa buhay sa kakaibang paraan ngayong batid naman ng lahat na hindi pa nagiging normal ang sitwasyon.
