Nakatikim ng sermon mula kay Senadora Cynthia Villar si Philippine Carabao Center Executive Director Dr. Arnel Del Barrio dahil sa kalagayan ng dairy industry ng bansa.
Pinagalitan ni Villar si Del Barrio dahil hindi ito nagpatayo ng mga processing center para sa mga gatas ng kalabaw samantalang nasa Carabao Center na pala ang pondo para rito.
Giit ng senadora, pinabigyan niya ang Carabao Center ng P500-milyong budget at kalahati nito ang pwedeng pagkunan ng P10-milyon na pampatayo ng processing center.
Ikinagalit pa ni Villar ang panay na research na ginagawa ng kagawaran ngunit wala naman aniyang aplikasyon o resulta sa mga pananaliksik ng mga ito.
Lalong ikinairita ni Villar nang madinig niya na maglalaan ang Carabao Center ng P28-milyon para sa feeding program o para sa pagpapainom ng gatas ng kalabaw sa mga bata.
Tinangka ni Dr. Del Barrio na magpaliwanag at para itanggi na mayroon silang feeding program pero hindi makasingit kay Villar.
