Welcome sa human rights group na Karapatan ang hatol na guilty sa mga pangunahing akusado sa karumaldumal na Maguindanao massacre case.
Ayon kay Karapatan secretary general Cristina Palabay, ang hatol na pagkakabilanggo ay di lamang sampal sa mga Ampatuan kundi maging sa kaalyado ng mga ito na si dating Pangulong Gloria Macapagal Arroyo.
Kasabay nito, hinimok ni Palabay ang publiko na manatiling mapagmatyag lalo’t hindi aniya matatawaran ang pagiging malapit ni Arroyo kay Pangulong Rodrigo Duterte na posibleng magresulta sa posibleng paggawad ng pardon sa mga Ampatuan.
Nanawagan din ang grupo para sa pagbuwag sa mga private armies na ginagamit ng mga warlords at mga pulitiko para manatili sa kapangyarihan at maghasik ng takot.
Samantala, tiniyak ng grupong Karapatan na patuloy nilang ipaglalaban ang hustisya para sa lahat ng biktima ng paglabag sa karapatang pantao.
