4 ang patay kabilang na ang isang ahente ng Philippine Drug Enforcement Agency (PDEA) sa ikinasang buy bust operations sa Ipil, Zamboanga Sibugay kamakalawa ng gabi.
Kinilala ni Ipil Municipal Police Office Chief P/Maj. Lee Eric Humpa ang napatay na PDEA agent na si Jack Ronald Bastatas na napuruhan sa engkuwentro ng mga awtoridad sa 4 na drug suspects.
Ikinasa ang operasyon sa Purok Javier, barangay Upper Pangi sa nasabing bayan kung saan doon din sumiklab ang engkuwentro.
Nagresulta iyon sa pagkasawi ng 3 pang drug suspect habang naaresto ang isa at ikinasugat naman ng pulis na kinilalang si P/Cpl. Richie Novie Janeo na nasa ligtas nang kalagayan.
Nagpaabot naman ng labis na pakikiramay ang liderato ng PDEA sa pamilyang naulila ni Bastatas subalit iginiit nito na magpapatuloy ang kanilang pinaigting na kampaniya kontra iligal na droga.
With report from Jaymark Dagala
