Naaresto na ang ika-anim sa pitong (7) nakapugang preso sa kulungan sa Antipolo.
Ayon kay Police Lt. Col. Villaflor Bannawagan, hepe ng Antipolo police, nadakip ang nakatakas na presong si Murphy Sison sa kanyang bahay sa San Mateo Rizal, kagabi, sa tulong ng isang informant.
Si Sison na isang dating construction worker ay nahaharap sa kasong pagnanakaw.
Samantala, sinabi ni Bannawagan na patuloy pa rin ang kanilang operasyon para madakip ang isa na lamang natitirang nakatakas na preso.
Habang papatawan naman ng disciplinary action tulad ng limitadong visiting hours ang naibalik nang mga puga.
Narekober na rin aniya ang lagareng ginamit ng mga preso para makatakas.
