Humingi na ng paumanhin ang Hungarian camerawoman na nasibak sa kanyang trabaho sa N1TV matapos makuhanan ng video na pinapatid at sinisipa ang mga nagtatakbuhang refugee.
Ayon sa camerawoman na si Petra Laszlo, pinagsisisihan na niya ang kanyang ginawa ngunit nilinaw nitong hindi siya racist at walang pusong tao.
Depensa pa ng Hungarian camerawoman, nagkamali siya sa kanyang desisyon dahil sa pag-aakala aniyang aatakihin siya ng mga nagtatakbuhang refugee.
Maliban dito, nangangamba din si Laszlo para sa kanyang kaligtasan lalo pa’t bumabaha aniya ang death threats na kanyang natatanggap magmula nang kumalat ang video nito sa social media.
Ipapaaresto
Binalaan ni Hungarian Prime Minister Viktor Orbin na kanyang ipapaaresto ang lahat ng mga refugee na ilegal na tatapak sa kanilang bansa.
Ayon kay Orban dapat maibalik ang kaayusan sa kanilang bansa lalo pa’t nanlalaban pa sa kanilang mga pulis ang mga refugee.
Sinabi ni Orban na patuloy nilang tinutupad ang kanilang obligasyon bilang miyembro ng European Union ngunit simula aniya sa Setyembre 15 ay ipatutupad na ang mahigpit na Immigration laws.
Samantala, pinapurihan naman ni Orban ang pulisya sa magandang trabaho ng mga ito sa pagharap sa mga refugees nang hindi gumagamit ng anumang puwersa.
By Ralph Obina