Handa na ang bagong hepe ng PNP-Criminal Investigation and Detection Unit-Central Visayas na si Supt. Lito Patay na arestuhin ang Cebuano businessman at big time umanong drug lord na si Peter Lim.
Gayunman, aminado si Patay na hindi magiging madali ang pag-aresto at paghahanap kay Lim lalo’t wala pa namang warrant o natatanggap na utos mula sa kanyang mga superior.
Nakilala si Patay dahil siya ang naging commander ng Quezon City Police District-Station 6 sa Batasan area na tinaguriang “deadliest station” noong 2016 dahil sa dami ng mga napatay na kriminal kabilang ang mga drug personality.
Naupo si Patay bilang commander ng PNP-CIDG Central Visayas noon lamang Agosto 6 o limang araw bago idiin ng Department of Justice si Lim sa pagkakasangkot sa illegal drugs.
Samantala, aminado naman ang regional commander ng CIDG na kailangan niya ng tulong subalit hindi nito binanggit kung isasama niya sa kanyang deployment sa Visayas ang tinaguriang “Davao boys.”
Ito ang grupo ng sampung pulis na sumama kay Patay sa kanyang assignment sa QCPD-Station 6 noong 2016.
