Patay ang isang hinihinalang drug suspek habang arestado ang apat na iba pa sa magkahiwalay na anti-drug operations ng QCPD o Quezon City Police District.
Kinilala ni QCPD Director for Operations Senior Supt. Ronaldo Ylagan ang nasawing suspek bilang alyas Doo na nanlaban aniya sa mga pulis matapos matunugang poseur buyer ang nakipagtransaksyon sa kanya sa bahagi ng barangay Gulod, Novaliches.
Narekober sa suspek ang isang kalibre .38 na baril, ilang gramo ng hinihinalang shabu at buy bust money.
Samantala, arestado naman ang magtiyahin na sina Florante Acepcion at Laura Herrera sa hiwalay na drug buy bust operation sa barangay San Roque Cubao kung saan nakunan pa ng video ang dalawa na nagrerepack ng iligal na droga.
Habang arestado rin sa magkahiwalay na operasyon ang mga drug suspect na sina Jocelyn Macasona at Delson Bulanday sa barangay E. Rodriguez at barangay Kaunlaran sa Quezon City.
Narekober naman sa mga ito ang nasa labing siyam (19) na sachet ng hinihinalang shabu, mga drug paraphernalia at isang libo’t limang daang pisong (P1,500) buy bust money.
—-
