Pinababalik ng COA o Commission on Audit sa lahat ng mga opisyal at kawani ng state run television network na PTV-4 ang pondong nagkakahalaga ng sampu’t kalahating milyong piso.
Ito’y makaraang mahalukay ng COA ang iba pang mga kuwestyunableng financial transactions ng PTV partikular na ang pagbibigay ng allowance at mga benepisyo sa kanilang coverage sa SEA o Southeast Asian Games nang walang basbas mula sa Office of the President.
Iginiit ng COA na labag sa Presidential Decree 1597 na nagtatakda na kailangang aprubado ng Office of the President ang mga ibibigay na allowance at benepisyo sa mga kawani at opisyal ng pamahalaan.
Kinuwestyon din ng COA ang hindi pagpapataw ng PTV ng liquidated damages sa kanilang mga suplayer na hindi naman nakapaghatid ng kanilang serbisyo at produkto na aabot sa 67 milyong piso.
Kasunod nito, inatasan ng COA ang PTV na ibasura na ang mga kontrata sa kanilang mga suplayer na hindi naman nakapaghatid ng kanilang serbisyo at produkto sa tamang oras.
Maliban dito, nasilip din ng auditing body ang 1.3 milyong pisong halaga ng proyekto para sa extension ng kanilang parking lot na napag-alamang non-existent.
—-
