Muling ipinaalala ng Simbahang Katolika sa mga deboto at mananampalataya ang kahalagahan ng pag-aayuno maging ng abstinensya sa darating na Biyernes Santo.
Ayon kay Caloocan Bishop Emeritus Deogracias Yñiguez, mas dapat bigyang pansin ng mga Katoliko na maliban sa hindi pagkain ng karne at limitadong pagkain, dapat ding iwasan ang anumang bagay na nakapagbibigay sarap at ligaya sa tao bilang bahagi aniya ng pagsasakripisyo.
Para naman kay Fr. Jerome Secillano, Executive Secretary ng CBCP o Catholic Bishops’ Conference Permanent Committee on Public Affairs, walang ibang hinihiling ang simbahan sa mga mananampalataya kung hindi taos-pusong debosyon, pagsisisi at pagmamahal sa Diyos gayundin sa kapwa.
Bagama’t hindi obligado ang mga Katoliko na pumunta sa mga simbahan mula Huwebes Santo hanggang Sabado de Gloria, hinihikayat pa rin ang lahat na makiisa sa banal na mga pagdiriwang sa mga panahong ito.
Hindi rin minamasama ng simbahan ayon kay Fr. Secillano ang pagpunta sa mga pasyalan at dalampasigan ngayong Semana Santa, subalit huwag sanang iwaglit ang pag-aalay ng panalangin sa kabila ng pagpapahinga.
—-
