Itinanggi ng head ng Technical Working Group ng Special Committee on Retirement na si Atty. Jocelyn Fabian ang mga paratang ni Atty. Larry Gadon laban sa kanya.
Sa naunang pagdinig ng House Committee on Justice sa impeachment ni Chief Justice Maria Lourdes Sereno, inihayag ni Gadon na pumili ang punong mahistrado ng mangunguna sa T.W.G. sa ilalim ng special committee ng isang abogado na walang alam at sapat na kakayahan para sa mataas na posisyon.
Ayon kay Gadon, personal na magkakilala sina Sereno at Fabian kaya ito nakapasok sa Korte Suprema bukod pa sa iisa ang pananampalataya ng dalawa at magkasama pa sa kanilang simbahan.
Gayunman, itinanggi ni Fabian ang mga paratang na ni Gadon sa pagpapatuloy ng pagdinig sa probable cause sa impeachment ni Sereno.
Aniya, hindi niya personal na kakilala ang punong mahistrado at hindi rin sila malapit na magkaibigan o magkasama sa iisang church bagaman pareho silang Born-Again Christian at hindi rin si Sereno ang nagpasok sa kanya sa S.C.
