Pinakakalma ni PBA o Puwersa ng Bayaning Atleta Partylist Rep. Jericho Nograles ang publiko hinggil sa pinalawig na pag-iral ng batas militar sa Mindanao.
Ayon sa mambabatas, walang dapat ikabahala at ikatakot ang lahat dahil napatunayan namang mabuti ang layunin ng pamahalaan para tugisin at wakasan na ang terorismo sa rehiyon.
Wala rin naman aniyang naiulat o naitalang pang-aabuso sa karapatang pantao sa panig ng militar at pulisya gayundin ay walang mamamahayag na ipiniit dahil sa pagbabalita ng sitwasyon sa Marawi.
Bilang isang taga-Mindanao, sinabi ni Nograles na batid niya ang kalagayan ng kaayusan at kapayapaan sa rehiyon na nangangailangan ng pambihirang mga hakbang.
