Nangako si Justice Secretary Vitaliano Aguirre na mag-iingat na siya sa mga bibitawan niyang pahayag.
Ito’y makaraang ulanin muli ng batikos ang kalihim matapos ang ginawa niyang pagbibiro sa harap ng mga tagasuporta ni Pangulong Rodrigo Duterte sa Luneta noong Pebrero 25.
Sa panayam ng Karambola kay Aguirre, muli nitong iginiit na biro lamang ang kanyang naging pahayag sa nasabing pagtitipon na aniya’y hindi na dapat pinalalaki pa.
“Ang sinasabi ko nga nawawalan tayo ng sense of humor, sana paminsan-minsan mag-relax tayo, ako naman very tight na ako sa mga ginagawa ko, siguro yun lang ang pagkakataon ko na para naman ang aking mabigat na dinadala bilang Secretary of Justice ay makapag-unwind.” Ani Aguirre
Subalit nagpatutsada si Aguirre sa mga kritiko nito na aniya’y siya ang nakita dahil sa hindi nagtagumpay ang planong pabagsakin ang administrasyon.
“Napakaliit na bagay, syempre ang inaasahan mo alam mo makakapag-people power ka, tapos dadalawang libo lang ang dumating? tapos nakita nila yung almost half a million ng tao sa Luneta, talagang nawalan na sila ng sense of humor.” Pahayag ni Aguirre
By Jaymark Dagala | Karambola (Interview)
