Tiwala si Justice Secretary Vitaliano Aguirre na mas bibigyang bigat ng Korte Suprema ang panig ni Judge Juanita Guerrero sa paglabas ng arrest warrant laban kay Senadora Leila de Lima.
Ito ang naging reaksyon ng kalihim sa inihaing petition for certiorari ng kampo ni De Lima sa korte na kumukuwestyun sa kautusan ng Muntinlupa RTC Branch 204.
Pangunahing argumento ni De Lima ang isyu ng hurisdiksyon ngunit, paliwanag ni Aguirre, matagal na itong nadesisyunan ng Korte Suprema sa ilang mga kaso.
Paalala ni Aguirre, naghain din naman mismong si De Lima, noong Justice Secretary pa siya, ng kaso laban kina dating Pangulong Gloria Arroyo at dating COMELEC Chairman Benjamin Abalos sa Regional Trial Court.
By: Avee Devierte / Bert Mozo
