Umakyat na sa labing-isa (11) ang nasawi kabilang ang apat na bata sa pagbaha bunsod ng walang tigil na ulan sa ilang bahagi ng Visayas at Mindanao partikular sa Misamis Oriental.
Kinilala ang ilan sa mga nasawi na sina Jaime Chan, 3 taong gulang ng Gingoog City; CJ Lapuz, 7 taon ng bayan ng Magsaysay; Kian Montecino, 10 taon ng bayan ng Opol at Nilo Quiloman, 54 na taon ng Gingoog City.
Tinaya naman sa 1,600 pamilya o nasa 6,800 katao ang apektado ng pagbaha sa labing-apat (14) na bayan at isang lungsod sa lalawigan.
Una ng isinailalim sa state of calamity ang Cagayan de Oro City dahil sa matinding pagbaha na resulta ng malakas na pag-ulang katumbas ng halos isang buwan.
Pinaghalong Low Pressure Area at tail-end ng cold front ang nagdala ng pag-ulan sa Mindanao batay sa forecast ng PAGASA.
By Drew Nacino
