Nakatakdang isumite sa Vatican sa ikalawang pagkakataon ang mga dokumento ng Pilipinong kandidato sa pagka – Santo.
Ayon kay Father Mhar Balili, Vice Postulator para sa isinusulong na sainthood ni Archbishop Teofilo Camomot, idineklara nang valid ng Congregation for the Causes of Saints ng Vatican ang diocesan process.
Sinabi ni Balili na lumabas ang resulta matapos ang pitong (7) buwan na naisumite ito kaya’t magsisimula na ang Roman stage kung saan isusulong naman ang “positio” na isang dissertation para patunayan ang pagiging bayani ni Camomot at kung bakit dapat maging Santo.
Pagkatapos nito aniya ay isusumite na ng Congregation for the Causes of Saints ang rekomendasyon sa Santo Papa na siyang magpapasya kung karapat dapat maging Santo si Camomot.
Ipinabatid ni Balili ang patuloy na pagdarasal para sa isang milagro para sa beatification ni Camomot at isa pang milagro para sa canonization nito.
