Tiwala si PBA Party-list Representative Jericho Nograles na susunod nang tutukuyin ng Land Transportation Franchising and Regulatory Board o LTFRB kung magkano ang kabuuang nakolekta ng Grab Philippines sa paniningil nito ng P2-per-minute charge.
Kaugnay naman ito ng inihihirit ni Nograles na refund mula sa Grab kasunod na rin ng pagsuspendi ng LTFRB sa dalawang piso kada minutong sinisingil ng nasabing transport network company sa kanilang mga pasahero.
Gayunman, iginiit ni Nograles na hindi dapat i-ako ng Grab Philippines sa kanilang mga drivers ang pagbibigay ng refund sakaling aprubahan ito ng LTFRB.
Babala pa ni Nograles, nakahanda siyang samapahan kasong syndicated at large scale estafa ang Grab kung ibibigay sa mga drivers nito ang responsibilidad sa pagbabayad ng refund.
“Kung baka sakali na magkaroon na talaga ng refund na hinihingi natin ay dapat hindi po sisingilin ng Grab ito sa mga driver nila, ang driver ay walang kakayahan na i-edit or ayusin ang algorithm ng Grab na nagde-determine ng fares ng mga mananakay, so ang Grab and Grab alone lang po ang dapat magbayad ng refund.” Ani Nograles
Samantala, tiniyak naman ni Nograles na kanya ring tututukan ang iba pang mga paglabag ng Grab Philippines.
“’Yung isa ay student discount na hindi nila properly na fina-follow, pangalawa ay ‘yung mga cancelled pick-up, since September 2015 pa ‘yan pinagbabawal ng LTFRB pero pasaway pa rin ang Grab.” Pahayag ni Nograles
(Ratsada Balita Interview)