Ni-relieve na sa puwesto ni Philippine National Police Chief, Dir. Gen. Oscar Albayalde sina Quezon City Police District-Station 4 Commander, Supt. Carlito Grijaldo at PO3 Dennis Saño.
Kaugnay ito sa pagkamatay ni Genesis Argoncillo alyas ‘Tisoy’ na binugbog umano habang nakakulong matapos arestuhin sa gitna ng ‘Anti-Tambay Drive’ sa Novaliches, noong Hunyo 15.
Inatasan din ni Albayalde si National Capital Regional Police Office Director, Chief Supt. Guillermo Eleazar na imbestigahan si QCPD Director, Chief Supt. Joselito Esquivel kung may kinalaman ba ito sa resulta ng autopsy.
Ipinauubaya na rin ng Chief PNP kay Eleazar kung i-re-relieve sa pwesto si Esquivel.
Samantala, batay sa autopsy ng PNP-Crime Laboratory ay multiple blunt force trauma sa leeg, ulo, dibdib, balikat at braso ang sanhi ng kamatayan ni Argoncillo taliwas sa pahayag ng QCPD na asphyxia o kinapos ng hangin dahil umano sa sobrang siksikan sa piitan.
Katarungan, sigaw ng pamilya ni alyas Tisoy
Katarungan ang sigaw ng pamilya ng bente singko anyos na si “Tisoy” o Genesis Argoncillo, ang presong natagpuang patay sa loob ng kulungan ng Quezon City Police Station 4 sa Novaliches, noong Hunyo 15.
Ayon kay Marilou Agoncillo, ‘binaboy’ ng mga pulis ang kanyang kapatid gayong hindi naman ito kriminal at nagpa-load lamang noong biyernes nang arestuhin sa gitna ng ‘Oplan Galugad’ sa Barangay Sauyo.
Ikinuwento anya ni Tisoy na pagpasok pa lamang niya sa bilangguan ay binugbog siya at imposible ang pahayag ni QCPD Station 4 commander, Supt. Carlito Grijaldo na sinadya ni Argoncillo na saktan ang sarili.
Itinanggi rin ni Marilou ang alegasyon ni grijaldo na nanggulo at nagwala si Tisoy kaya ito inaresto.