Wala umanong impluwensya ang dating Philippine National Police (PNP) Chief na si Allan Purisima sa pagkakahirang sa bagong hepe ng pulisya na si Police Director Ricardo Marquez.
Inihayag ito ng Palasyo kasunod ng maagang batikos sa pagtatalaga sa bagong PNP Chief Kapalit ng magreretirong si PNP Deputy Director General Leonardo Espina.
Sinabi ni Presidential Communications Secretary Sonny Coloma na ginawang batayan ni Pangulong Noynoy Aquino ang kuwalipikasyon ni Marquez.
Sa hanay, aniya, ng mga pinagpiliang kandidato, si Marquez ang may pinakamahusay at pinakamataas na kuwalipikasyon.
Nauna rito, inihayag ng Coalition of Filipino Consumers na kaya napili si Marquez bilang PNP Chief ay bata umano ito ng nasibak sa puwestong si Purisima.
By Avee Devierte | Aileen Taliping (Patrol 23)