Nakatakdang magsampa ng ethics complaint si Surigao del Sur Rep. Prospero Pichay laban kay Surigao del Norte Rep. Robert “Ace” Barbers matapos muntik ng magpang-abot ang dalawa kahapon sa house panel hearing hinggil sa pag amyenda sa Saligang Batas.
Matatandaang ikinairita ni Barbers ang mosyon ni Pichay na magpasa sila ng isang resolusyon na mag-iimbita sa Senado upang samahan ang Kamara na mag-convene bilang constituent assembly (Con-Ass).
Giniit ni Barbers hindi nakasaad sa 1987 Philippine Constitution ang Con-Ass kaya hindi sila maaaring mag-convene.
Dahil dito, nag-init ang ulo ni Barbers at sinabi na “stupid at senseless” ang naturang mosyon at hindi ito dapat pang pansinin.
Ayon kay Pichay, “unparliamentary” ang naging asal ni Barbers, at hindi umano maintindihan ni Pichay kung bakit biglang nagalit si Barbers.
Dahil sa naging tensyon sa pagitan ng dalawang kongresista, napilitan si Constitutional Amendments Committee Chairman Roger Mercado na suspendihin ang kanilang pagdinig.
By Mariboy Ysibido