Naging maningning ang 2017 Metro Manila Film Festival Parade of Stars sa gitna ng pagdagsa ng fans upang masilayan ang kani-kanilang idol habang lulan ng makukulay na floats.
Sa walong float na pumarada, ang kapamilya star na si Vice Ganda ang tila may pinaka-malaking ngiti matapos mapabilang muli ang kanyang pelikula sa parade of stars.
Bida si Vice sa pelikulang “Gandarrapiddo: The Revenger Squad” kasama sina Daniel Padilla at 2015 Miss Universe Pia Wurtzbach.
Nagsimula ang parada sa Muntinlupa Sports Complex at nagtapos sa filinvest event grounds.
Aminado si Vice na masaya siya sa kanyang pagbabalik MMFF at na-miss niya ito ng sobra.
Siyempre hindi nagpahuli ang iba pang floats mula sa iba pang entries gaya ng “Ang Panday” ni Coco Martin; “Haunted Forest” ng Regal Films; “All of You” nina Derek Ramsay at Jennylyn Mercado, “Siargo” ni Erich Gonzales, “Meant To Beh” ni Bossing Vic Sotto; “Deadma Walking” ni Joross Gamboa at musical na “Ang Larawan” ni Paolo Avelino at Rachel Alejandro.
