Nagsunuran na rin ang iba pang kumpanya ng langis sa umento sa presyo ng kanilang mga produktong petrolyo.
Piso at animnapung sentimos (P1.60) ang itinaas sa presyo ng kada litro ng gasolina, P1.25 sa kada litro ng diesel habang P1.15 naman ang itataas sa kada litro ng kerosene.
Alas-12:01 ng hatinggabi nagpatupad ng kanilang oil price hike ang kumpanyang Flying V sa lahat ng mga nabanggit na produkto.
Gayundin naman ang mga kumpanyang Shell, Seaoil at Petron epektibo naman alas-6:00 ngayong umaga.
Subalit sa gasolina at diesel lamang magpapatupad ang mga kumpanyang PTT at Phoenix Petroleum sa parehong oras.
Bagama’t parehong presyo ang itinaas ng kumpanyang Eastern Petroleum sa kada litro ng kanilang diesel, P1.50 naman ang magiging taas presyo nila sa kada litro ng gasolina.
Ayon sa Department of Energy, sinasabing nabawi na ang lahat ng mga ni-rollback sa presyo ng langis mula Enero.
Batay sa kasalukuyang monitoring, papalo na sa P1.20 ang net price o ang itinaas sa kada litro ng diesel habang P0.27 naman ang net price sa kada litro ng gasolina.
By Jaymark Dagala
