May naging kapabayaan din ang pamahalaan sa pagtaas ng kaso ng tigdas at panunumbalik ng sakit na polio sa Pilipinas.
Ito ang tinukoy mismo ng World Health Organization (WHO).
Ayon kay WHO Country Representative Rabindra Abeyasinghe, hindi lamang maaaring isisi sa pagtanggi ng mga magulang na mabakunahan ang kanilang ang mga anak ang pagkakaroon ng measles at polio outbreak sa bansa.
Ito rin aniya ay bunsod ng mga maituturing na logistical challenges sa panig ng pamahalaan tulad ng kakulangan o kawalan ng stocks ng mga bakuna sa mga health facilities sa bansa lalo na sa mahihirap na lugar.
Dagdag ni Abeyasinghe, kapuna-puna rin ang kakulangan ng mga staff o tauhan sa mga health centers sa Pilipinas.
Batay sa pag-aaral ng WHO, tinatayang umaabot sa 750,000 mga kabataang Filipino ang hindi pa rin nababakunahan.
