Binatikos at tinawag na hindi makatuwiran ng isang senador ang ginagawang pagtugis ng Kuwaiti government sa mga Overseas Filipino Workers o OFWs para litisin.
Ito ay matapos na i-rescue ng mga opisyal ng embahada ng Pilipinas doon ang ilang OFWs dahil sa reklamong pagmamaltrato ng kanilang mga amo.
Ayon kay Senator Francis ‘Chiz’ Escudero, sapat na ang paghingi ng paumanhin ng Pilipinas sa Kuwait bagama’t ginawa lamang ng mga embassy official ang kanilang tungkulin para protektahan ang Pinoy workers doon laban sa pang-aabuso.
Buweltang tanong ni Escudero kung ano naman ang ginagawa ng Kuwaiti government sa mga mamamayan nila na inaabuso at nilalabag ang karapatang pantao ng mga dayuhang manggagawa katulad ng mga Pilipino.
Dapat din aniyang panagutin ng pamahalaan ng Kuwait ang kanilang mga mamamayan na abusado at nangmamaltrato.
Ayon naman kay Senador Kiko Pangilinan mahalagang umiral at manaig ang diplomasya sa kinahaharap na sitwasyon ng mga Overseas Filipino Workers na sinagip ng mga opisyal ng Philippine Embassy sa Kuwait.
Ito ang inihayag ng senador sa harap ng isinasagawang pagtugis ng Kuwaiti government sa mga nasabing OFW dahil sa umano’y paglabag sa kanilang security policy nang sagipin ang mga ito.
Ayon kay Pangilinan, maituturing na isang malaking hamon sa Malacañang at Department of Foreign Affairs o DFA ang nasabing sitwasyon.
Iginiit pa ni Pangilinan, hindi dapat pabayaan ng administrasyong Duterte ang mga OFW na naiipit sa dalawang gobyerno.
Magugunitang, pinalalayas na ng pamahaalan ng Kuwait si Ambassador Renato Villa at patuloy ding pinaghahanap ang dalawang sinagip na OFWs para litisin sa kabila nang paghingi ng paumanhin ng DFA sa nasabing bansa.
By Krista de Dios / Aiza Rendon / with report from Cely Bueno
