Hindi malalagay sa alanganin ang security network ng mga Telecommunications sa bansa sa gitna na rin ng inaasahang pagpasok ng ikatlong Telco Player sa 2018.
Iyan ang pagtitiyak ng Malakaniyang sa harap na rin ng pangamba na magkaroon ng access sa network ng mga Pilipino ang dayuhang mamumuhunan na maglalagak ng kanilang negosyo.
Ayon kay Presidential Spokesman Harry Roque, isa sa mga prayoridad ng administrasyon ay ang pagpapabuti ng cyber security ng bansa at nakatitiyak silang may ginagawa rin ang mga policy makers hinggil dito.
Binigyang diin pa ng kalihim na hindi naman nawawala ang foreign player sa alinmang telecom provider at tiyak aniyang may ginagawa namang hakbang para protektahan ang interes ng bansa.
Magugunitang nagpahayag ng pangamba si Senador Francis Pangilinan na posibleng ma-hack ang mga datos ng lahat ng mga Pilipino sakaling maki-alam na ang ikatlong player sa industriya sa pamamagitan ng kumpaniya mula sa China.