Nanindigan ang DOTR o Department of Transportation na hindi nila ititigil ang operasyon ng MRT o Metro Rail Transit Line 3 sa harap na rin ng kaliwa’t kanang aberya na nararanasan nito.
Ito ang tugon ni Transportation Undersecretary Cesar Chavez kasunod ng panawagan ni Senadora Grace Poe na itigil pansamantala ang operasyon ng naturang tren.
Ayon kay Chavez, ikinunsidera na ito ni Transportation Secretary Arthur Tugade pagpasok pa lamang ng taong kasalukuyan bunsod na rin ng masamang kundisyon nito.
Gayunman, iginiit ni Chavez na hindi nila kakayaning masakrispisyo ang kapakanan ng humigit kumulang sa kalahating milyong mga pasahero nito araw-araw na dumidipende lamang sa serbisyong hatid ng MRT.
Magugunitang ginawa ni Senadora Poe ang naturang panawagan upang matutukan ang pagkukumpuni at ang mga karampatang pagsasaayos sa sistema nito para na rin sa kapakinabangan ng publiko.