Nagpapatuloy ang imbestigasyon ng Parañaque-PNP hinggil sa pagkamatay ng isang babaeng assistant manager sa Solaire Hotel and Casino, kamakalawa.
Sa panayam ng DWIZ, sinabi ni Parañaque Chief of Police Sr. Supt. Ariel Andrade na inaalam pa nila ang motibo sa pamamaslang kay Edjel Durolfo matapos umano itong pagamitin ng droga at pagtulungang gulpihin ng 4 na suspek, kabilang ang live-in partner ng biktima.
Bukod dito, nais din aniya nilang malaman ang tunay na dahilan ng pagkamatay ni Durolfo.
“Nakipag-coordinate na din po kami sa ospital at kasalukuyang hinihintay natin yung result ng autopsy, ang report po sa atin, may mga pasa ang victim sa katawan, pero hindi po natin agad na sinasabi na mula ito sa pambubugbog o pananakit, ang gusto nating agad na malaman ay yung real cause ng death.” Ani Andrade.
Ipinabatid pa ni Andrade na iniimbestigahan nila ang live-in partner ng biktima na kinilalang si Rodney Ynchausti.
“Sa ngayon ang ginawa natin ay pinapuntahan na natin sa kanyang tinitirhan, ang sabi ng investigator wala po doon, tinitignan namin kung ano pa ang ibang contact number at tinitirhan niya para mapuntahan siya at makuhanan siya ng pahayag kung ano talaga ang nangyari.” Pahayag ni Andrade.
By Meann Tanbio | Ratsada Balita
