Ipinauubaya na ng Metro Manila Development Authority o MMDA sa tatlo nilang tauhan kung kakasuhan nila ang buko vendor na nakasagupa nila habang nagsasagawa ng clearing operations sa Pasay City.
Ayon kay MMDA General Manager Jojo Garcia, hindi rin tutulong ang MMDA sa tatlo nilang tauhan kung magpasya ang buko vendor na idemanda ang mga ito.
Sinabi ni Garcia na batay sa kanilang imbestigasyon, nauna talaga ang buko vendor na si Romnick Relos kaya’t gumanti ang tatlong tauhan ng MMDA.
Gayunman, panuntunan aniya ng MMDA na magpatupad ng maximum tolerance kaya’t nagpasya silang suspendihin ng labing limang (15) araw ang mga ito.
“‘Yun nga ang sinasabi ko, ito ang sinabi niya, ‘yun ang sinabi ng kabila, nagdemandahan sila, nagsuntukan sila, korte lang po ang puwedeng magsabi kung sino ang guilty at not guilty, sa MMDA po kahit ano pa ang dahilan wala pong karapatang manakit ang ating mga empleyado.” Ani Garcia
(Balitang Todong Lakas Interview)
