Nauwi sa executive session ang pagpupulong ng bicam o Bicameral Conference Committee kahapon kaugnay sa panukalang pambansang pondo para sa susunod na taon.
Ito’y makaraang kuwestyunin ni Senador Panfilo Lacson ang pondong inilaan para sa mga infra projects na may nakabinbin pa ring problema tulad ng right of way.
Giit ni Lacson, hindi dapat pondohan ang mga proyekto kung nakapangalan lamang iyon sa isang John Doe dahil tiyak na pagmumulan ito ng anomalya at korapsyon.
Una rito, inihirit ni Lacson na tapyasan ng 50 milyong piso ang inilaang pondo para sa Department of Public Works and Highways o DPWH para sa susunod na taon.
Muling ipagpapatuloy ng Bicameral Conference Committee ang kanilang pagtalakay sa nasabing panukala sa Disyembre 4 o sa Lunes ng susunod na linggo.
—-