Umapela ang Malakanyang sa mga kabataan na iwasan na ang pag-inom ng mga powder juice drink at iba pang sweetened beverages tulad ng softdrinks.
Ito’y sa gitna ng pangamba ni Pangulong Rodrigo Duterte sa epekto sa kalusugan ng mga nabanggit na inumin partikular ang sugar content nito.
Ayon kay Presidential Spokesman Harry Roque, hindi nila hinihikayat bagkus ay mas mabuting huwag nang uminom ng sugar drinks ang mga bata dahil wala naman talagang mabuting dulot ito sa kalusugan.
Nag-a-alala anya si Pangulong Duterte lalo’t nabatid na purong asukal lamang ang nilalaman ng mga juice drink na pawang nilagyan ng flavor.
Magugunitang ini-anunsyo sa Malakanyang noong Martes, Hunyo 19 na asahan na sa susunod na buwan o dalawang buwan mula ngayon ay may makikita ng health warning sa mga pakete ng powdered juice drinks.
