Umaabot na sa P23 million pesos na halaga ng infrastructure projects gaya ng kalsada, slope protection at hanging bridge ang nasira habang maraming pananim naman ang natabunan ng lupa at nalunod na mga alagang hayop sa Bacnotan, La Union sanhi ng pananalasa ng bagyong Egay.
Ayon kay Bacnotan, La Union Mayor Francis Fontanilla, maliban sa mga tulong na ipinagkaloob na ng Department of Agriculture (DA), umaasa pa rin sila ng tulong mula sa national at provincial government ng La Union.
Samantala, isang 45-anyos na lalake naman ang naiulat na nawawala sa Bacnotan dahil sa pagbaha.
Umaasa naman si Mayor Fontanilla na tutuparin agad nila Interior Secretary Mar Roxas at Public Works Secretary Babes Singson ang mga tulong na kanilang ipinangako kahapon sa San Fernando, La Union.
“Pumunta sa San Fernando, La Union si Secretary Babes Singson, at Secretary Mar Roxas po, sana kung ano po yung napag-usapan kahapon dahil may mga immediate needs po kaming sinabi sa kanila, sana maibigay kaagad.” Pahayag ni Fontanilla.
Samantala, halos dalawang araw na ding walang supply ng tubig ang bayan ng Bacnotan sa La Union.
Sa gitna na rin ito ng halos hindi pa humuhupang tubig baha sa bayan ng Bacnotan matapos bumayo ang bagyong Egay.
Ayon pa sa National Disaster Risk Reduction and Management Council (NDRRMC), hindi pa rin naibabalik ang landline at internet services sa mga bayan ng San Gabriel at Aringay.
By Mariboy Ysibido | Ratsada Balita | Judith Larino
