Nagbabala ang Department of Social Welfare and Development hinggil sa pagpapa-ampon online kapalit ng pera.
Ayon kay DSWD Protective Services Bureau Director Alice Bonoan, labag sa batas at maituturing na trafficking ang alok na pagpapa-ampon ng ilang ina sa kanilang isisilang at isinilang na sanggol gamit ang Facebook.
Binigyang diin ni Bonoan na mahigpit ang proseso ng pag-aampon na ipinatutupad ng pamahalaan upang matiyak aniyang tugma ang mga bata sa mga mag-aampon sa mga ito.
Samantala, aabot naman sa 19 na pekeng Facebook account para sa pag-aampon ang nadiskubre ng DSWD.
Kumikilos na ang ahensya at nakikipag-unayan na sa mga kinauukulang ahensya ng pamahalaan para pigilan ang naturang ilegal na gawain.