Umalma si dating Foreign Affairs Secretary Albert del Rosario sa naging pahayag ni Defense secretary Delfin Lorenzana na mali ang naging paraan ng nakaraang administrasyon hinggil sa paghawak sa isyu ng West Philippine Sea.
Aminado ang dating kalihim na mabigat ang kalooban niya sa pahayag ni Lorenzana na itinuturing pa naman umano niyang isang mabuting kaibigan.
Giit ni del Rosario, ginamitan nila ng diplomatikong pamamaraan ang paghawak sa isyu kung saan idinaan nila ito sa “bilateral at multi-lateral approaches” at nanalo sa arbitral tribunal sa The Hague, Netherlands.
Sinabi ni del Rosario na nanghihinayang siya sa napanalunang laban ng Pilipinas, na ngayon ay mistulang nawawalan na umano ng halaga dahil sa pamamaraan ng paghawak dito ng Duterte administration.