Sinampahan na ng Daraga Provincial Prosecutors Office si Daraga Albay Mayor Carlwyn Baldo ng patung-patong na kaso ng murder.
Ito’y kaugnay sa nangyaring pagpatay kay Ako Bicol Party list Representative Rodel Batocabe noong Disyembre nang nakaraang taon.
Kaninang umaga ay inihain sa Legazpi Regional Trial Court (RTC) ang dalawang bilang ng kasong murder at anim na bilang naman ng attempted murder laban kay Baldo at anim na iba pa.
Lumalabas sa imbestigasyon ng Daraga Provincial Prosecutors na may kinalaman o may probable cause para isampa ang mga nabanggit na kaso laban sa naturang mayor at iba pa nitong kasamahan.
Samantala, maglalabas naman ng warrant of arrest ang Legazpi RTC oras na mapatunayan ng korte na may kinalaman nga si Baldo at iba pa nitong kasama sa naturang mga kaso upang kaagad na makulong at magsagawa ng pagdinig sa hukuman.
Magugunita namang pansamantalang nakalaya si Baldo makaraang payagang magpiyansa ng halagang P3 million sa kasong illegal possession of firearms noong nakaraang Pebrero.
