NATIONAL NEWS

Tinututukan ng Samar Provincial Health Office ang pagsirit ng mga kaso ng chikungunya sa nasabing lalawigan matapos umabot sa 225 ang mga naitalang kaso ng naturang sakit.

Batay sa impormasyon ng Samar PHO, pinakamaraming kaso ang naitala sa Basey, na sinundan ng Gandara at Paranas.

Nakukuha ang chikungunya sa kagat ng lamok na nagdadala rin ng dengue at Zika; gayunman, hindi nakamamatay ang chikungunya. Bagkus, magdudulot ito ng sakit sa kasu-kasuan sa loob ng ilang linggo o ilang buwan.

Nagpadala na ng labindalawang blood sample ang Samar PHO sa Research Institute for Tropical Medicine para sa laboratory testing, at inaasahan ang mga resulta sa loob ng dalawa o tatlong linggo. | Sa panulat ni Anjo Riñon

May sampung araw ang Department of Migrant Workers (DMW) upang maghain ng motion for reconsideration kaugnay ng pagbasura sa mga reklamong plunder, malversation of public funds, at paglabag sa Anti-Graft and Corrupt Practices Act laban kay dating Overseas Workers Welfare Administration (OWWA) Administrator Arnell Ignacio.

Ayon sa Office of the Ombudsman, ikinalulugod nito ang naging pahayag ng DMW na plano nitong kuwestiyunin ang naging desisyon sa pamamagitan ng paghahain ng motion for reconsideration.

Nagsimula ang 10-araw na palugit mula sa pagtanggap ng DMW ng resolusyon. | via Jenn Patrolla (Patrol 38)

Nanawagan si House Deputy Minority Leader at ACT Teachers Party-list Rep. Antonio Tinio kay Metropolitan Manila Development Authority Chairman Don Artes na tuluyan nang sibakin sa puwesto si MMDA Special Operations Group–Task Force for Road Clearing Gabriel Go.

Ito’y dahil sa umano’y mapang-abusong pag-uugali matapos mag-viral ang video ng paghuli nito sa isang guro.

Ayon kay Tinio, hindi sapat ang ipinataw na suspensyon kay Go dahil sa umano’y paulit-ulit nitong paglabag sa direktiba ng sariling ahensya.

Tinukoy ni Tinio ang paggamit ni Go sa personal social media post ang mga operasyon ng MMDA.

Batay sa video na kumalat, hinuli ni Go ang isang guro dahil sa paglabag sa Helmet Law at kalaunan ay in-upload pa umano ang video ng pangyayari sa kanyang personal na social media account, sa kabila ng pakiusap ng guro na huwag itong ipaskil.

Giit ni Tinio, bagama’t may paglabag ang guro, nararapat pa ring maging magalang, mapagkumbaba, at may paggalang sa karapatan at dignidad ng mamamayan ang mga tagapagpatupad ng batas.

Aniya, malinaw na ginagamit ni Go ang kanyang posisyon at mga operasyon ng MMDA para sa personal vlogging, para sa pansariling interes at para sumikat at kumita.

Binigyang-diin din ng mambabatas na hindi ito ang unang kontrobersiyang kinasangkutan ni Go.

Noong 2025, humingi rin ito ng paumanhin matapos mag-viral ang video ng umano’y pamamahiya nito sa isang opisyal ng Philippine National Police sa isang road clearing operation sa Quezon City.

Dahil dito, sinabi ni Tinio na dapat paimbestigahan ng Makabayan Bloc ang insidente sa pagbubukas ng Kongreso matapos ang State of the Nation Address, at posibleng busisiin din ito sa budget deliberations ng MMDA.

Muling iginiit ni Tinio na dapat igalang ng ating mga law enforcers ang sinumang inaaresto o sinisita dahil sa paglabag sa batas-trapiko at huwag pahiyain o gawing content sa social media vlogging. | via Geli Mendez (Patrol 30)

Natatanggap na ng Office of the Ombudsman ang counter affidavit na isinumite ni Senador Alan Peter Cayetano kaugnay ng isinasagawang preliminary investigation sa reklamong Obstruction of Justice na inihain ng ilang miyembro ng civil society.

Ayon sa Ombudsman, isinumite ng kampo ni Cayetano ang counter affidavit kahapon, Hulyo 15.

Hinihintay naman ng tanggapan ang counter affidavits ng mga kapwa niya respondent na sina Senador Robinhood Padilla at ang na-dismiss na Acting Senate Sergeant at Arms na si Police Major General Mao Apalsa. | via Jenn Patrolla (Patrol 38)

Muling iginiit ni Pasang Masda President Ka Obet Martin na hindi sapat ang planong pisong dagdag-pasahe, upang maibsan ang epekto ng patuloy na pagtaas ng presyo ng langis sa bansa.

Ayon kay Ka Obet, malaking tulong ang dagdag-pasahe ngunit hindi nito ganap na matutugunan ang pang-araw-araw na gastusin ng mga tsuper kaya’t hiling nila kay Pangulong Ferdinand Marcos Jr. na agad nang ipatupad ang naaprubahang isang pisong taas-pasahe na pansamantalang naantala.

Binigyang-diin din niya na ang mga fuel subsidy na ipinamamahagi ay pansamantalang ayuda lamang at kinakailangan nila ng mas pangmatagalang solusyon, upang maprotektahan ang sektor ng pampublikong transportasyon.

Kaugnay nito, nanawagan ang Pasang Masda sa Department of Energy na pag-aralang mabuti ang mga polisiya kaugnay ng oil price adjustments.

Sa huli, humingi ng pang-unawa ang Pasang Masda sa mga commuter at tiniyak na ang kanilang kahilingan ay para mapanatili ang kabuhayan ng mga tsuper at ang maayos na serbisyo sa publiko.—sa panulat ni Reabelle Medina

Mariing binatikos ni Philippine Coast Guard Commodore Jay Tarriela ang pinakahuling pahayag ng China kaugnay ng 2016 Arbitral Award sa West Philippine Sea, matapos nitong balaan ang European Union at ilang bansang Europa na huwag suportahan ang arbitral ruling.

Ayon kay Commodore Tarriela, hindi ito isang legal na argumento kundi isang tahasang pagbabanta sa mga bansang sumusuporta sa batas internasyonal.

Giit ng opisyal, ipinapakita lamang nito ang paggamit ng Beijing ng pananakot sa halip na umasa sa legal na batayan.

Binigyang-diin din ni Tarriela na ang desisyon ng Arbitral Tribunal ay pinal at may bisa sa ilalim ng United Nations Convention on the Law of the Sea o UNCLOS, na nilagdaan at pinagtibay rin ng China.

Sa kabila nito, nanindigan ang Pilipinas at ilang kaalyadong bansa na walang legal na batayan ang malawak na maritime claims ng China sa West Philippine Sea at nanawagan ng mapayapang resolusyon batay sa batas internasyonal.—sa panulat ni Reabelle Medina

Kinumpirma ni Attorney Michael Poa, isa sa mga spokesman ni Vice President Sara Duterte, na posibleng mabawasan ng ilan ang mga testigo sa hanay ng defense team ng bise presidente.

Ito’y matapos na mag-withdraw ang prosekusyon ng ilang testigo na nakatakdang humarap kaugnay ng ikaapat na Articles of Impeachment na may kinalaman sa kasong “grave threats.”

Gayunman, sinabi ni Atty. Poa na masyado pang maaga para sabihin kung magkakaroon din ng pagbabawas sa hanay ng mga testigo ng depensa.

Mahaba pa aniya ang proseso ng impeachment trial at sa mga susunod na yugto pa ilalahad ang pinal na listahan ng kanilang mga testigo.

Bukod dito, iginiit din ni Atty. Poa na walang epekto sa estratehiya ng depensa ang naganap na pag-withdraw ng ilang testigo ng prosekusyon.—sa panulat ni Reabelle Medina