NATIONAL NEWS

Lumagpas na sa doble ang bilang ng listahan ng mga testigong posibleng iharap ng House prosecution panel sa impeachment trial ni Vice President Sara Duterte.

Ito ang kinumpirma ni House lead prosecutor at Batangas Rep. Gerville Luistro, na mula sa 25 ay umabot na sa 57 ang kabuuang bilang ng mga potential witnesses upang matiyak na lahat ng mahahalagang ebidensya ay maisasama sa paglilitis.

Paliwanag ni Luistro, mas naging maingat ang prosecution team dahil sa panuntunang hindi na ipapakita ang pagkakakilanlan ng mga testigo sa trial proper.

Gayunman, nilinaw niya na hindi pa napagpapasyahan ng prosecution team kung ilan sa 57 ang aktwal na ipapakita bilang witness stand sa pagsisimula ng impeachment trial sa Hulyo 6.

Dagdag pa ni Luistro, patuloy nilang gagamitin ang mga natitirang panahon upang mas paghandaan ang paglilitis. | via Geli Mendez (Patrol 30)

Ibinunyag ni Senador Erwin Tulfo na bukod kay Senador Joel Villanueva, may dalawa pang senador mula sa minority bloc ang hinihikayat nilang lumipat sa majority.

Ayon kay Senador Tulfo, isang lalaki at isang babae ang kasalukuyang nililigawan, pero wala pang malinaw na resulta ang mga pag-uusap.

Aminado ang senador na hindi madali para sa ilang kapwa-senador na mag-over-the-bakod dahil sa pangambang mabatikos ng mga basher, vlogger, at troll, pati na ang kanilang mga pamilya.

Samantala, nilinaw ni Senador Erwin Tulfo na wala pang katiyakan kung tuluyan nang tatawid sa majority bloc si Senador Villanueva, na mahalaga upang makabuo ng sapat na bilang ang mayorya at maihalal ang bagong pangulo ng Senado.—sa panulat ni Jordan Gutierrez

Posibleng matapos sa September 2026 ang impeachment trial ni Vice President Sara Duterte sa Senate Impeachment Court.

Ito ayon kay House lead prosecutor at Batangas Rep. Gerville Luistro sakaling magsimula na ang paglilitis sa July 6, 2026, nang walang anumang pagkaantala sa proseso.

Maaari aniyang magpatuloy ang mga pagdinig at makumpleto sa loob ng tatlong buwan o sa katapusan ng Setyembre ng kasalukuyang taon.

Binigyang-diin ni Congw. Luistro na mahalagang pag-usapan sa pre-trial conference ang schedule ng mga pagdinig upang maayos na mapaghandaan ng magkabilang panig ang presentasyon ng mga ebidensya at mga testigo.—sa panulat ni Jordan Gutierrez

Nakatakdang ipasubpoena ng House prosecution team ang aabot sa limampung mga armas at baril na nadiskubreng pag-aari ni Vice President Sara Duterte at asawang si Atty. Manases Carpio.

Ito ang kinumpirma ni House prosecutor at Bicol Saro Partylist Rep. Terry Ridon, na isa sa mga ipapasubpoena na ebidensya ang pagkakaroon ng mga armas at baril ng mag-asawang Duterte-Carpio.

Ayon kay Ridon, ang naturang mga armas at baril ay hindi umano nakalista o idineklara sa Statement of Assets, Liabilities and Net Worth o SALN ng Bise Presidente sa kahit na anong taon mula 2007 hanggang 2025.

Sinabi ni Ridon na ang mga undeclared firearms ni VP Sara ay kanila nang isinama sa pre-trial brief ng prosecution at ito ang kanilang pinakabagong ebidensya para dikdikin sa impeachment trial ang Bise Presidente.

Kabilang sa mga baril na natuklasang pag-aari ni VP Sara at ng kanyang mister ay ang revolvers, rifles, pistols, shotgun at iba pa.

Sinabi ni Ridon na kanilang iimbitahan ang mga dealer ng mga armas at baril ng Duterte-Carpio batay sa listahan na inilabas ng PNP Firearms and Explosives Office.

Kasama rin sa iimbitahan ang ilang mga eksperto upang ma-estimate kung magkano ang halaga ng limampung high-powered firearms ng mag-asawang Duterte-Carpio.

Ihinalimbawa ni Ridon na napatalsik noon si yumaong dating Supreme Court Chief Justice Renato Corona dahil sa non-disclosure ng kanyang mga pag-aari at hindi dapat exempted dito ang Bise Presidente. | via Geli Mendez (Patrol 30)

Pinagpapaliwanag ng Department of Environment and Natural Resources si Davao City Mayor Sebastian Duterte kaugnay ng mga insidente ng pagtatapon ng basura sa labas ng tanggapan ng DENR Region 11 sa Lanang, Davao City.

Hiniling ni DENR Regional Executive Director Mercedes Dumagan ang paliwanag ng alkalde matapos mahuli ng mga tauhan ng ahensya ang ilang indibidwal na nagtatapon ng halo-halong basura sa harap ng kanilang opisina.

Ayon sa DENR, may ilang nahuling nagtatapon ng basura na nagsabing ang lugar ay pansamantalang collection point, batay anila sa isang Facebook post ni Mayor Duterte noong Hunyo a-kuwatro.

Kaugnay nito, binigyan ng limang araw ang alkalde para magbigay ng kanyang paliwanag sa naturang isyu.—sa panulat ni Jordan Gutierrez

Isasagawa ng Senate majority bloc ang nakatakdang special session nang walang drama at delay.

Ito ang iginiit ni Senador Juan Miguel Zubiri, kasabay ng pagtitiyak na papasok at magtatrabaho sila upang gampanan ang kanilang tungkulin para sa kapakanan ng mamamayan.

Tiniyak naman ni Senador Erwin Tulfo na pinaghahandaan na ng liderato ng Senado ang nasabing sesyon para aksyunan ang mga nakabinbing panukalang batas.

Samantala, inaasahang sa isasagawang special session ay magkaroon na ng sapat na numero ang Gatchalian bloc para opisyal nang maihalal si Senador Sherwin Gatchalian bilang pangulo ng Senado.—sa panulat ni Jordan Gutierrez

Nais ng House prosecution panel na gamitin ang wikang Filipino sa impeachment trial ni Vice President Sara Duterte upang mas madaling maunawaan ng publiko ang mga pagdinig.

Ayon kay House lead prosecutor at Batangas 2nd District Rep. Gerville Luistro, ihahain nila ang mungkahing ito sa pre-trial conference sa Huwebes, June 18, upang mas maraming mamamayan ang makasubaybay sa mga pangyayari sa paglilitis.

Iminungkahi rin ni Congw. Luistro ang pagkakaroon ng sabayang pagsasalin sa iba’t ibang wika at diyalekto habang isinasagawa ang impeachment trial.

Samantala, bukas naman si House prosecution spokesman at Lanao del Sur Rep. Zia Alonto Adiong sa paggamit ng sign language para maging mas accessible ang proseso para sa mga may kapansanan sa pandinig at pagsasalita.—sa panulat ni Jordan Gutierrez