HEADLINES

Tututukan ng Senate Impeachment Court sa pagsisimula ng ika-limang linggo ng impeachment trial ang umano’y maling paggamit ng confidential funds ni Vice President Sara Duterte.

Ayon sa House Prosecution Panel, ilalatag sa ika-labing-isang araw ng paglilitis ang mas detalyadong impormasyon kung paano ginamit ng Bise Presidente ang mga pondong na-withdraw sa bangko.

Inaasahang haharap sa impeachment court mamayang alas-diyes ng umaga ang dalawang auditors ng Commission on Audit na sina Roderick Wamil at Xylene Del Campo, habang sa Agosto a-singko tetestigo si Marivic Pareja ng Kamara.

Kinumpirma ni House Prosecutor Terry Ridon na bubusisiin kung saan napunta ang mga in-encash na pondo, habang posibleng mabanggit ang pangalang “Mary Grace Piattos” kaugnay ng paggamit ng confidential funds ng Pangalawang Pangulo.

Bahagi pa rin ito ng pagtalakay sa unang artikulo ng impeachment case na tumutukoy sa umano’y maling paggamit ng Bise Presidente sa 612.5 million pesos confidential funds ng Office of the Vice President at Department of Education.

Nauna nang tumestigo noong Hulyo a-bente nwebe ang dalawang opisyal ng Land Bank of the Philippines na nagsabing may nakita silang “unusual” cash withdrawals mula sa mga account ng OVP at DepEd. l mula sa panulat ni Jordan Gutierrez

Natanggap na ng Senado ang tax records ni Vice President Sara Duterte mula sa Bureau of Internal Revenue matapos itong aprubahan ni Pangulong Ferdinand Marcos Junior.

Nabatid na naipasa ng BIR ang mga dokumento sa Office of the Clerk of Court bago ang itinakdang deadline ng impeachment court kahapon.

Bukod sa mga tax records ng mag-asawang Duterte-Carpio, naisumite rin ng ahensya ang iba pang negosyo na sinasabing may kaugnayan sa mag-asawa.

Nauna nang inatasan ng impeachment court si BIR Commissioner Charlito Martin Mendoza na tumugon sa subpoena para sa tax records ng bise presidente kaugnay ng alegasyon ng hindi maipaliwanag na yaman sa ilalim ng Article II ng impeachment case laban kay VP Sara . l mula sa panulat ni Anjo Riñon

Muling magtutuos ang prosekusyon at depensa sa Senate Impeachment Court para sa pagpapatuloy ng impeachment trial ni Vice President Sara Duterte ngayong araw.

Inaasahang tatalakayin na ang Article 1 ng impeachment case kaugnay sa umano’y maling paggamit ng bise presidente sa 612.5 million pesos confidential funds ng Office of the Vice President at Department of Education.

Kabilang sa mga ihaharap na testigo ng prosekusyon sina dating Landbank Branch Managers Violeta Constantino at Nenita Camposano, gayundin si Marivic Pareja ng House Legislative Archives and Museum Management Service.

Nauna nang inilipat ng impeachment court ang oras ng paglilitis sa alas-diyes ng umaga hanggang alas-tres ng hapon, habang gugulong naman ito tuwing Lunes hanggang Miyerkules, simula sa buwan ng Agosto.

Matatandaang sinuspinde ng senado ang pagdinig noong Lunes, July 27 upang bigyang-daan ang SONA ni Pangulong Ferdinand Marcos Junior, habang ipinagpaliban din kahapon, July 28 dahil sa isinagawang kontra-SONA ni Senate Minority Leader Alan Peter Cayetano.   l mula sa panulat ni Jordan Gutierrez

Binuksan na ng Kongreso ang ikalawang regular na sesyon, kasabay ng ikalimang State of the Nation Address ni Pangulong Ferdinand Marcos Junior kahapon.

Pinangunahan ni House Speaker Faustino Dy III ang transition ng regular session sa Kamara kung saan tiniyak niya na pagtitibayin ang mga panukalang magbibigay solusyon sa mga pangangailangan ng mga Pilipino.

Samantala, si Senate President Sherwin Gatchalian naman ang nanguna sa pagbubukas ng sesyon sa Senado.

Ayon kay Senate President Gatchalian, tututukan nila ang mataas na presyo ng mga pangunahing bilihin, sahod ng mga manggagawa, mataas na singil sa kuryente, transportasyon at iba pa. | mula sa panulat ni Reianne Antiquina 

Isang babaeng Grade 3 student ang umano’y binugbog hanggang sa mapatay ng kanyang tatlong kaklase sa isang pampublikong paaralan sa Davao City noong Hulyo 17.

Ayon sa imbestigasyon ng Davao City Police, nagreklamo ang walogn taong gulang na biktima ng pananakit ng ulo kasunod ng insidente at dinala sa ospital kung saan siya namatay habang ginagamot para sa namuong dugo sa ulo.

Sinabi ng mga awtoridad na ang insidente ay opisyal na iniulat ng ina ng biktima noong Miyerkules, Hulyo 22. Hinangad ng kanyang pamilya ang hustisya para sa kanyang pagkamatay.

Naglunsad na ng imbestigasyon ang mga pulis hinggil sa insidente.

Hinimok din pulisya ang publiko na iwasan ang mga haka-haka na pahayag sa social media upang matiyak ang integridad ng patuloy na imbestigasyon at igalang ang privacy ng nagdadalamhating pamilya.