Patay ang isang hinihinalang tulak ng droga at isang kasama nito sa buy bust operation sa Barangay UP Campus sa Quezon City kaninang umaga.
Ayon sa pulisya, naisugod pa sa East Avenue Medical Center ang dalawa ngunit pumanaw rin agad dahil sa mga tinamong tama ng baril.
Kinilalang si alias Lupa ang target na drug suspect samantalang inaalam pa ang pagkakakilanlan ng kasama nito.
Sa pahayag ni Police Superintendent Wilson Delos Santos, nagtangkang tumakas ang dalawa nang mapagtantong mga pulis ang ka-transaksyon nila sa bentahan ng droga.
Narekober ng grupo mula anti-illegal drugs unit ng Quezon City Police District Station 9 ang kalibre kwarenta’y singko at trenta’y otso at getaway vehicle sa pinangyarihan ng buy bust operation sa Alburetum Forest.
By: Avee Devierte
