Pinaalalahanan ng Bureau of Immigration (BI) ang lahat ng mga Filipinong nagpaplanong magtungo sa ibang para mamasyal o may kaugnayan sa turismo.
Kasunod ito ng pasiya ng pamahalaan na muling ipatupad ang ban o pagbabawal sa mga non-essential travel ng mga Filipino sa ibang bansa.
Ayon Kay Immigration Commissioner Jaime Morente, tanging mga mahahalagang biyahe lamang muli ng mga Filipino patungo sa ibang bansa ang pinapayagan.
Kabilang aniya rito ang mga Overseas Filipino Workers, mga may hawak ng student visa at permanent residents sa pupuntahang bansa at maging mga dayuhan.
Habang kabilang naman sa mga maituturing na essential travels ang mga biyahe na may kinalaman sa medical, humanitarian, negosyo at trabaho.
Una nang sinabi ni Presidential Spokesperson Harry Roque na nagpasya ang IATF na ibalik ang ban sa mga non-essential travels matapos na iisang insurance company lamang ang pumayag na magbigay ng travel at health insurance kaugnay sa coronavirus disease 2019 (COVID-19) pandemic.
