Kinumpirma ni Davao City Chinese Consulate Alex Yang na dumaong nga sa lunsod noong nakalipas na Biyernes ang isang barko ng China.
Ayon kay Yang, walang ibang ginawa sa Davao City ang Chinese vessel na ito, kundi kumuha lamang ng suplay na tubig at pagkain.
Dumating aniya sa lunsod ang Yuan Wang 5, 9:00 ng umaga ng Biyernes at mananatili ito doon hanggang umaga ng Martes.
Paliwanag ni Yang, malayo ang naging paglalayag ng kanilang barko dahil galing ito ng public sea at open sea, bago nakarating ng Davao City, at muli itong papalaot pa-China Sea sa susunod na araw hanggang sa makabalik na ng China.
Umaga naman ng Sabado, nabigyan ng pagkakataon ang ilang space science students ng Ateneo de Davao University na makapasok at makapaglibot sa loob ng naturang Chinese vessel na syang ginagamit para sa monitoring ng Chinese satellites.