Gilbert Perdez

NAGSAGAWA ng outreach mission ang Malacañang Press Corps (MPC) sa Bahay Aruga, isang halfway house para sa mga batang may kanser sa lungsod ng Maynila.

Bitbit ang iba’t ibang donasyon tulad ng mga gamot, damit, at cash, ang grupo na nagkokober sa Pangulo, ay pinangunahan ng kanilang presidente na si Ms. Pia Gutierrez-Dela Cruz ng ABS-CBN, kasama ang iba pang MPC officers na sina Aileen Taliping, Cath Valente, Leth Narciso, Haydee Sampang, at iba pa.

Nakipagsanib-pwersa rin ang media group sa Private Sector Advisory Council (PSAC) na nag-donate naman ng P500,000.

Layon ng hakbang na ito na suportahan ang mga pangangailangan ng mga batang pasyente at kanilang mga pamilya na umaasa sa Bahay Aruga para sa pangangalaga at matutuluyan habang ginagamot ang mga ito.

Ipinaliwanag naman ni Ms. Jean Bonilla-Bernardo, Board Member ng Bahay Aruga Inc., na ang kanilang shelter ay isang libreng tirahan para sa mga batang may kanser.

Aniya, itinayo ito ng kanyang tiyahin na si Ms. Marietta Bonilla noong January 31, 2014 para kupkupin at arugain ang mga pasyenteng sumasailalim sa gamutan sa Philippine General Hospital (PGH).

“Lumuwas [sila rito] sa Maynila para magpagamot po sa PGH at lahat ng mga kaso namin dito ay mga kanser mula edad 0 hanggang 19 taong gulang,” sabi ni Bonilla.

Dagdag pa niya, karamihan sa kanilang mga kliyente ay mula sa malalayong probinsya sa buong Pilipinas, kabilang ang Luzon, Visayas at Mindanao.

“Taos-puso po ang aming pasasalamat sa Malacañang Press Corps, sa Aboitiz Foundation team. Maraming-maraming salamat. Ang inyong blessing po na shinare sa amin ay napakalaking tulong po para po sa aming sustainability at malaking tulong din sa maibabahagi namin sa mga warriors na meron kami,” dagdag pa niya.

PINANGUNAHAN ni Pangulong Ferdinand Marcos Jr. ang pagpapasinaya sa Mariveles-Hermosa-San Jose (MHSJ) 500 Kilovolt transmission line ng National Grid Corp. of the Philippines (NGCP) sa Bataan.

Sa kanyang speech, sinabi ni PBBM na sa sandaling maging operational na ang linya ay mas mapapalakas nito ang power transmission services hindi lang sa Region 3 kundi maging sa Metro Manila.

Kokonekta naman ang transmission line sa iba pang proyekto sa Bataan gaya ng Battery Energy Storage System sa Limay na napasinayaan noong nakaraang taon at Bataan-Cavite Interlink Bridge.

Ang MHSJ 500 Kilovolt (kV) ay ginastusan ng P20.94 bilyon at inaprubahan ng Energy Regulatory Commission (ERC).

Ayon kay Pangulong Marcos, bahagi ng proyekto ang mahigit 275.6 circuit kilometers na overhead lines na mayroong 395 towers at 2 bagong substations.

Ang MHSJ transmission line ay may kabuuang transmission capacity na 8,000 megawatts (MW).

“This way, we can meet our increasing energy demand, encourage technological advancements, and produce more employment opportunities for our people,” ayon sa Pangulo.

Samantala, ipinagmalaki naman ni NGCP President Anthony Almeda na nasa 59 million households at iba pang power consumers ang magbebenepisyo sa MHSJ bilang backbone facility na magpapatatag pa ng power transmission services sa Luzon.

“This critical backbone provides a new high voltage link capable of transmitting a total of 8,000MW of power from power plants in Bataan and Zambales,” ani Almeda.

Kasabay nito, nagpasalamat din si Almeda kay Pangulong Marcos bunsod ng commitment nito na mapahusay pa ang imprastruktura sa bansa na naging dahilan upang makumpleto ang ilang NGCP big-ticket projects sa nakalipas na 12 buwan, kabilang ang Mindanao-Visayas Interconnection, Cebu-Negros-Panay 230kV Interconnection, at ang bagong 500kV line sa Bataan.

“Marami na pong nagawa ang NGCP, at marami pa kaming gagawin para makatulong na maiangat ang ekonomiya ng bansa. Asahan n’yo po na kaisa ng gobyerno, lagi kaming nakahandang tumulong at sumuporta,” pahayag pa ni Almeda.