DWIZ 882

Muling pinagtibay ng Commission on Elections o COMELEC ang desisyon nitong i-disqualify ang Moro Ako Party sa 2026 BARMM Parliamentary Elections bukas, Setyembre 14.

Sa Certificate of Finality and Entry of Judgment, sinabi ng COMELEC na wala itong natanggap na motion for reconsideration laban sa en banc ruling na nagpapatibay sa disqualification ng partido.

Matatandaang nabigo ang Moro Ako na matugunan ang mga requirement sa pagpaparehistro, na naging dahilan ng disqualification nito.

Sa desisyon noong Agosto 27, pinagtibay ng COMELEC en banc ang nauna nitong desisyon na tanggihan ang apela ng Moro Ako dahil sa kawalan umano ng sapat na batayan.

Sa ngayon, walong major regional parliamentary political parties o RPPP lamang ang pinayagang makilahok sa halalan bukas. | Sa panulat ni Reianne Antiquina

Kinumpirma ng Department of Education (DepEd) na kabilang sa Grade 8 reproductive health education ang pagtuturo ng aktuwal na paggamit ng contraceptives, kabilang ang condom.

Nilinaw ito ni Education Secretary Sonny Angara sa House Committee on Appropriations hearing matapos tanungin ni Akbayan Party-list Rep. Perci Cendaña kung kailan ituturo sa mga paaralan ang tamang paggamit ng condom.

Ayon kay Angara, nagsisimula sa mas mababang baitang ang mga aralin tungkol sa katawan at personal na kalusugan, habang ang aktuwal na paggamit ng contraceptives ay ituturo pagtuntong ng Grade 8.

Saklaw ng ito ng DepEd Order No. 25, s. 2025, na nagtatakda na dapat naaayon sa edad at development ng mga mag-aaral ang mga reproductive health lesson.

Nagpapatuloy ang paghahanap sa Filipino doctor na si Dr. Juan Carlos Manalo, na missing matapos ang flash floods at mudslides sa Nepal.

Ayon sa Philippine Embassy sa New Delhi, patuloy ang pakikipag-ugnayan nito sa mga awtoridad sa Nepal para sa search operations.

Tumutulong din ang embassy sa pamilya ni Manalo sa pagbibigay ng DNA samples, bilang bahagi ng proseso sa pagkilala sa mga missing.

Si Manalo, 30 anyos at tubong Tarlac City, ay biyahe umano kasama ang isang pilgrimage group nang tumama ang matinding baha at mudslides malapit sa Nepal-China border.

Huling nakipag-ugnayan ang pamilya ni Manalo sa kaniya noong Agosto 25.

Hanggang ngayon, hindi pa rin siya nakikita o nakokontak.

Inakusahan ng House Prosecution Team si Vice President Sara Duterte na umano’y mastermind sa paggamit ng ₱612.5 milyong confidential funds ng Office of the Vice President (OVP) at Department of Education (DepEd).

Tinawag ng House Prosecution ang umano’y scheme na “Confi Scam.”

Ayon sa House Prosecution, may kaugnayan umano si Duterte sa paggamit ng naturang confidential funds.

“Isang modus na kailangang ilantad, isang pananagutan kailangang harapin at isang pangalang ibinibigay namin sa mga alegasyong ito. Ito ay ‘confi scam,’ — Prosecution team adviser and spokesperson Robert Ace Barbers

Hinamon ni House Prosecutor at Bicol Saro Party-list Representative Terry Ridon si Vice President Sara Duterte na personal na humarap sa Senate Impeachment Court sa Lunes, September 14.

Kaugnay ito ng mga reklamo sa umano’y unexplained wealth laban sa Bise Presidente.

Ayon kay Ridon, dapat humarap si Duterte sa Senate Impeachment Court upang harapin ang mga reklamo laban sa kaniya.

Ang hamon ni Ridon ay kasunod ng pahayag ni Duterte na iniharap umano ang impeachment complaint laban sa kaniya nang walang ebidensya.

“This is a challenge to the Vice President: Magpakita po kayo sa Lunes” — cong. Ridon

Ipinag-utos ni Land Transportation Office (LTO) Chief Assistant Secretary Markus V. Lacanilao ang agarang paghinto sa paggamit ng LTO-IT system ng STRADCOM.

Alinsunod ito sa kautusan ng Office of the Ombudsman na ihinto ang paggamit ng STRADCOM system at gamitin ang LTMS sa mga transaksyon ng ahensya.

Sa ilalim ng mga memorandum ng LTO, sakop ng direktiba ang mga transaksyon sa driver’s license, rehistrasyon ng sasakyan, certificate of stock report, at iba pang miscellaneous transactions.

Kabilang sa driver’s license transactions ang renewal, bagong aplikasyon, duplicate o replacement, at pagbabago ng impormasyon.

Ayon kay Lacanilao, layunin ng paglipat sa LTMS na mapabilis at mapaayos ang proseso at mapabuti ang serbisyo ng LTO sa publiko.

Nilinaw ni dating Far Eastern University Institute of Law Dean Mel Sta. Maria na karapatan ni Vice President Sara Duterte na tumangging humarap bilang testigo sa kanyang impeachment trial.

Kasunod ito ng pahayag ng House Prosecution na nais nilang iharap si V.P. Sara bilang testigo sa kanyang impeachment case.

Ayon kay Atty. Sta. Maria, hindi maaaring pilitin ang Bise Presidente na magsalita o magbigay ng ebidensya na maaaring gamitin upang idiin o ipahamak ang kanyang sarili sa isang krimen.

Gayunman, sinabi ni Atty. Sta. Maria na maaari pa ring i-subpoena o ipatawag ng Senate Impeachment Court ang Pangalawang Pangulo.—sa panulat ni Reianne Antiquina

Aprubado na ng Regional Tripartite Wages and Productivity Board-National Capital Region ang 60 pisong dagdag sa arawang sahod ng mga manggagawa sa Metro Manila.

Sa ilalim ng Wage Order No. 28, tataas sa 755 pesos ang sweldo ng mga non-agricultural minimum wage workers mula sa umiiral na 695 pesos.

Habang itinakda naman sa 718 pesos ang sahod para sa sektor ng agrikultura, retail at service establishments na may labinglimang empleyado pababa, at manufacturing firms na may sampung empleyado pababa.

Inaasahan namang ipatutupad ang wage order sa Setyembre 26 o a-27.

Ayon sa Department of Labor and Employment, layunin ng umento sa sahod na palakasin ang purchasing power ng mga manggagawa at suportahan ang inklusibong paglago ng ekonomiya, alinsunod sa pangako ni Pangulong Ferdinand Marcos Jr.—sa panulat ni Reianne Antiquina

11 boto lamang ang kinakailangan mula sa senator-judges upang baligtarin ang unang ruling na nagsasabing kailangan ng labing-anim na boto upang mahatulan si Vice President Sara Duterte.

Ayon kay Impeachment Court spokesman Reginald Tongol, hindi kabilang sa botohan si Presiding Officer Francis “Chiz” Escudero dahil siya ang nagpasya sa 16-voting threshold.

Dahil anya apat na senador ang absent at hindi kasama sa pagbotong ang Presiding Officer, labing-siyam na senator-judge lamang ang boboto kaya’t sampung boto, o simpleng mayorya, ang kakailanganin upang baguhin ang threshold.

Gayunman, sinabi ng Tongol na kung magkakaroon ng tabla sa botohan lalo na kung may isa pang senador na hindi makadalo o kung dumalo naman ang isa pang absent na senador, mananatili ang naunang ruling ni Presiding Officer Escudero.

Nakatakdang isagawa ang botohan sa Setyembre a-bente-tres pagkatapos ng talakayan nina dating Chief Justices Hilario Davide Jr., Artemio Panganiban at Reynato Puno, gayundin ni dating Supreme Court Associate Justice Adolfo Azcuna.—sa panulat ni Reianne Antiquina