Hinamon ng isang mambabatas ang tatlong heneral na nasa shortlist ng pagpipilian para maging susunod na hepe ng Philippine National Police na sumailalim sa lifestyle check.
Ayon kay ACT – CIS Party List Representative Eric Go Yap, dapat mabigyan si Pangulong Rodrigo Duterte ng kopya ng record ng mga posisyong hinawakan nina Police Lt. General Archie Gamboa, Police Lt. General Camilo Cascolan at Police Major Gen. Guillermo Eleazar.
Ito aniya ay upang makita ng pangulo kung may mga kasong naisampa laban sa tatlong police officials at iba pang impormasyon na magpapadali sa pagpili nito ng susunod na PNP chief.
Iginiit pa ni Yap, hindi rin dapat maulit pa ang nangyari kay dating PNP chief police general Oscar Albayalde na nasangkot sa kontrobersiya sa ‘ninja cops’ at lumabas lamang nang malapit na itong magretiro.
