Sampu (10) pang hinihinalang kaso ng pagkamatay sa dengue matapos bakunahan ng dengvaxia ang idinulog sa Public Attorneys Office o PAO.
Ayon kay Atty. Persida Acosta, hepe ng PAO, bahagi ito ng halos tatlong libong (3,000) sumama sa kanila sa pagsasampa ng kaso laban kay dating Health Secretary Janette Garin, mga opisyal ng Sanofi Pasteur at Zuellig Pharma na syang distributor ng dengvaxia sa Pilipinas.
Ang kaso laban kina Garin ay may kaugnayan sa pagkamatay ng sampung taong gulang na si Angelica Pestilos na nasawi sa dengue, isang linggo matapos mabakunahan ng dengvaxia.
Pinanindigan ni Acosta ang kakayahan ng mga katulong nilang doktor sa pagsusuri sa mga hinihinalang biktima ng dengvaxia.
Pinuna ni Acosta na hindi naman inawtopsiya ng mga eksperto mula sa Philippine General Hospital (PGH) ang labing apat (14) na hinihinalang biktima ng dengvaxia, hindi aniya katulad ng sa kanila na inabot ng mahigit sa isang buwan ang pagsusuri sa tissue ng isa pa lamang sa mga biktima.
“Hindi po si Dr. Erfe lang na pinupukol nila ng kung ano-ano ang doktor na humahawak dito, at nag-oobserve din po si Dr. Leachon, isang doktor sa DOH, public health, so ang punto diyan ang PAO sabihin niyo nang hindi scientific, hindi qualified, opinyon niyo yan eh, pero maging busy san kayo hindi sa paninira, maging busy kayo sa pagsagip sa mga batang buhay pa, na nahihilo na, nilalagnat, may rashes, sumasakit ang tiyan, humihina ang katawan, dating walang sakit biglang nagkaka-lupus, kasi nasa pag-aaral yan ng mga siyentipiko, magkaka-serious illnesses ka.” Pahayag ni Acosta
(Ratsada Balita Interview)