Sinimulan na rin ang taunang traslacion ng Poong Itim na Nazareno sa Cagayan de Oro City dakong alas-4:00 ng kaninang madaling araw.
Nagsimula ang traslacion sa St. Agustine Cathedral na nasa sentro ng lungsod at dinala pabalik ang imahe sa parokya nito sa bahagi ng Claro M. Recto Street
Tinatayang nasa libu-libong deboto ng Poong Nazareno ang sumama sa prusisyon ng tinaguriang callejeron o ang isa sa mga replica ng poon na ibinigay ng simbahan ng Quiapo sa mga taga-Cagayan de Oro City.
Maliban sa Maynila at Cagayan de Oro, sabay-sabay ding idaraos ang traslacion ng Poong Itim na Nazareno sa iba’t ibang panig ng bansa ngayong araw.
Ililibot sa paligid ng Laoag City, Ilocos Norte ang imahe ng Nazareno na pagmamay-ari ng pamilya Jacinto na niyakap na rin ng mga Ilokano sa tuwing sasapit ang araw na ito.
May bersyon din ng traslacion sa parokya ng Nazareno sa Calabanga, Camarines Sur na siyang nag-iisang parokya sa Archdiocese of Caceres na ipinangalan sa poon.
Maliban sa prusisyon, sinamahan naman ng libreng gamutan at feeding program ang traslacion ng Poong Itim na Nazareno sa Davao City.
—-
