Pasado na sa ikatlo at huling pagbasa sa Kamara ang panukalang tax exemption sa mga medical oxygen, bakuna at iba pang medical products o essential goods ngayong may COVID-19 pandemic.
Sa botong 202 at walang pagtutol, inaprubahan ng mga mambabatas ang House Bill 8895 o “Public Health Emergency Importation Tax Exemption Act.”
Alinsunod ito sa hirit ni Pangulong Rodrigo Duterte na bigyan ng tax relief ang medical supplies manufacturers lalo na ng mga oxygen tank dahil sa pagtaas ng mga kaso ng COVID-19 at banta ng Delta variant.
Sa ilalim ng panukala, libre sa value added tax, custom duties at iba pang bayarin ang paggawa, importasyon, bentahan at donasyon ng ‘critical medical products’.
Kabilang din sa tax exemption ang “consumables” gaya ng alcohol, sanitizer, thermometer, testing kits maging mga equipment para sa waste managementat iba pa. —sa panulat ni Drew Nacino
