Asahan na ang pagbigat ng trapiko sa northbound lane ng North Luzon Expressway bukas, araw ng Sabado.
Ito’y dahil sa inaasahang pagdagsa ng mga manonood ng Tamang Panahon Concert ng noontime show na Eat Bulaga sa Philippine Arena sa Bocaue, Bulacan.
Ayon kay Kiko Dagohoy, tagapagsalita ng NLEX, magdaragdag sila ng mga traffic teams sa kahabaan ng NLEX at bubuksan din nila ang mga counterflow sa southbound lane.
Magiging katuwang din ng NLEX personnel ang MMDA gayundin ang Highway Patrol Group sa pagmamando ng trapiko sa bahaging iyon ng NLEX.
Mahigpit ding ipatutupad ani Dagohoy ang no parking sa kahabaan ng expressway tulad nang nangyari sa mga nakalipas na aktibidad ng religious group na Iglesia ni Cristo sa nasabing lugar.
By Jaymark Dagala
