Iginiit ng Department of Justice (DOJ) na hindi maaaring maging state witness si Suspended BuCor Chief Gen. Gerald Bantag na itinuturong mastermind sa pagpatay sa batikang mamamahayag na si Percival Mabasa o mas kilala bilang si Percy Lapid.
Kasunod ito ng kumakalat na balita matapos isapubliko ng kapatid ni Lapid na si Roy Mabasa, na posibleng gawing “state witness” si Bantag sakaling isiwalat nito ang lahat ng kanyang nalalaman sa naturang kaso.
Ayon kay Justice Secretary Jesus Crispin Remulla, si Bantag ay nahaharap sa kasong pagpatay kay Lapid kaya hindi ito pwedeng gawin bilang state witness.
Sa kabila nito, tiniyak ni Remulla ang kaligtasan ni Bantag at nangako na kanilang igagalang ang karapatan nito sakaling sumuko sa mga otoridad.
Sa ngayon, hinihintay nalang na mailabas ang subpoena laban kay Bantag kung saan inoobliga ito na sagutin ang mahahalagang katanungan na ibinabato laban sakaniya.
