Nakatakdang ihirit ng ilang transport group sa Land Transportation Franchising and Regulatory Board o LTFRB ang pagpapatupad ng surge pricing sa mga jeepney.
Ayon sa Grupong 1-Utak, P8.00 ang dapat bayaran ng mga pasahero mula alas-5:00 hanggang alas-8:00 ng umaga at alas-4:00 hanggang ala-6:00 ng hapon.
Habang P5.50 naman ang ibabayad ng mga pasaherong sasakay ng jeepney sa pagitan ng mga nabanggit na oras o di kaya’y mula alas-11:00 ng umaga hanggang alas-2:00 ng hapon.
Ayon kay Zenny Maranan ng 1-Utak at FEJODAP, hindi pinapakinggan ng pamahalaan ang mga mungkahi nila na makakabuti sa mga transport group.
“Kahit anong gawin namin eh, anuman ang mga iminumungkahi namin sa ating pamahalaan lalo na sa hanay ng departamento ng transportasyon ayaw nilang pakinggan eh, ang sinasabi nila parati ay kung ano ang gusto nila.” Pahayag ni Maranan.
By Mariboy Ysibido | Ratsada Balita
